یمن کی فوجی صلاحیتوں نے پینٹاگون کو حیران اور تشویش میں مبتلا کر دیا

شیعیت نیوز: صہیونی بین الاقوامی نیٹ ورک نے سیمافور کے حوالے سے کہا ہے کہ یمن میں حوثی ملیشیا خطے میں اسرائیلی اور امریکی مفادات کے لیے ایک بڑا خطرہ ہے اور گزشتہ جمعرات کی رات اسرائیل پر اس گروپ کے ڈرون اور میزائل حملے نے پینٹاگون کو حیران کر دیا۔

یمن اور جنگ کے مقام کے درمیان 2200 کلومیٹر کے فاصلے کے باوجود حوثی اسرائیل اور امریکہ کے لیے ایک ‘انوکھا خطرہ’ بن کر ابھر رہے ہیں۔

امریکی محکمہ دفاع کا کہنا ہے کہ حوثیوں نے متعدد ڈرونز اور طویل فاصلے تک مار کرنے والے کروز میزائلوں سے اسے نشانہ بنایا۔

سمافور کی رپورٹ کے مطابق اگرچہ اس حملے کو یو ایس ایس کارنی نے بحیرہ احمر میں روک لیا تھا اور اسے پسپا کر دیا تھا لیکن حوثیوں کی کارروائی نے پینٹاگون کو حیران کر دیا ہے۔

امریکی حکام کے مطابق اگرچہ حوثی باغیوں نے اس سے قبل ایران اور اس کے اتحادی گروہوں حماس اور لبنان کی حزب اللہ کی حمایت میں اسرائیل پر حملہ کرنے کی دھمکی دی تھی لیکن یہ پہلا موقع تھا جب انہوں نے اپنے الفاظ پر عمل کیا اور اپنی ’’طویل فاصلے تک مار کرنے کی صلاحیتوں‘‘ کا مظاہرہ کیا۔

یہ بھی پڑھیں : زمینی حملہ دشمن کے لئے تاریخی شکست کا پیش خیمہ ہوگا، صالح العاروی

گروپ کے اعلیٰ عہدیدار محمد علی الحوثی نے دو ہفتے قبل واشنگٹن کو خبردار کیا تھا کہ وہ مشرق وسطیٰ کے موجودہ تنازعے میں اسرائیل کی حمایت اور فلسطینی قوم کے خلاف جارحیت میں براہ راست مداخلت نہ کرے کیونکہ یہ علاقائی جنگ میں تبدیل ہوجائے گا۔

ایک سینیئر امریکی دفاعی عہدیدار نے اعتراف کیا کہ ایران برسوں سے حوثیوں کو فراہم کیے جانے والے سازوسامان کی پیچیدگی اور ہلاکت خیزی میں اضافہ کر رہا ہے۔ حوثیوں نے اپنی صلاحیتوں میں جو کچھ دکھایا ہے وہ علاقائی سلامتی کے لئے خطرہ ہے۔

سیمافور نے تجزیہ کاروں کے حوالے سے کہا ہے کہ حوثیوں کے پاس ممکنہ طور پر خطے میں اسلامی جمہوریہ کے اتحادیوں اور پراکسیوں میں سے بیلسٹک میزائلوں اور ڈرونز کا جدید ترین ذخیرہ موجود ہے۔

گروپ نے اس سے پہلے تجارتی مراکز کو نشانہ بنانے پر آمادگی ظاہر کی تھی۔ حوثیوں کے فوجی آپریشن میں 2019 میں مشرقی سعودی عرب میں آرامکو آئل ریفائنری پر ڈرون حملہ، جنوری 2021 میں ابوظہبی کے تجارتی مرکز پر حملہ اور بحیرہ احمر اور خلیج عدن میں تجارتی جہازوں پر متعدد حملے شامل ہیں۔

امریکی وزیر خارجہ انتھونی بلنکن نے خبردار کیا ہے کہ اگر ایران اور اس کے آلہ کاروں نے اس کے ٹھکانوں پر حملہ کیا تو امریکہ فیصلہ کن طور پر اپنا دفاع کرے گا۔

یہ بیان پینٹاگون کے ایک ترجمان کے اس بیان کے بعد سامنے آیا ہے جس میں انہوں نے کہا تھا کہ گذشتہ منگل سے اب تک عراق میں امریکی افواج پر کم از کم 10 بار اور شام میں تین بار حملے کیے جا چکے ہیں۔

عراق میں اسلامی جمہوریہ کی حمایت یافتہ ملیشیا نے بارہا متنبہ کیا ہے کہ اگر واشنگٹن نے جنگ میں براہ راست مداخلت کی تو وہ میزائلوں اور ڈرونز کے ذریعے خطے میں امریکی اہداف کو نشانہ بنائیں گے۔