مسلم نوجوانوں کی گرفتاری کے خلاف بھوک ہڑتال جاری

دہلی میں ہندوستانی مسلم نوجوانوں کی گرفتاری کے خلاف لوک جن شکتي پارٹی کے نوجوان لیڈر اور سماجی کارکن امانت اللہ خان اور دیگر افراد کی بھوک ہڑتال آج بھی جاری رہی۔
اطلاعات کے مطابق یہ ہڑتال دہلی کے مسلم آبادی والے علاقے جامعہ نگر میں آج تیسرے دن بھی جاری رہی۔
بھوک ہڑتال کرنے والے افراد اور ان کی طرفدار کئی مقتدر شخصیات کا کہنا ہے کہ وہ اگرچہ ہر قسم کی دہشت گردی کے خلاف ہیں لیکن انسداد دہشت گردی کے بہانے بے قصور مسلمانوں کی گرفتاری کے بھی خلاف ہیں۔
ان افراد کا کہنا ہے کہ وہ اس بات کے متمنی ہیں کہ ملک میں امن و مان قائم ہو اور جو حقیقی مجرم ہیں انہیں گرفتار کیا جائے۔
واضح رہے کہ ہڑتال کے پہلے دن ہندوستان کے سابق مرکزی وزیر اور لوک جن شکتی پارٹی کے صدر رام ولاس پاسوان نے بھی مسلم نوجوانوں کی گرفتاری کی مذمت کی تھی اور کہا تھا کہ وہ اس مسئلے کو پارلیمنٹ میں اٹھائيں گے۔