عراق: ایرانی کارکنوں پر حملہ کے منصوبہ ساز گرفتار
عراق میں گیس پائپ لائن پروجیکٹ پر کام کرنے والے ایرانی کارکنوں پر گذشتہ ہفتے ہونے والے حملے کے منصوبہ سازوں کو آج گرفتار کرلیا گیا۔ بغداد میں اسلامی جمہوریہ ایران کے سفیر حسن دانائی فر نے اعلان کیا ہے اس سلسلے میں صوبے دیالہ سے نو افراد کو گرفتار کیا گیا ہے جنھوں نے اپنے جرم کا اعتراف بھی کرلیا ہے۔ان ایرانی کارکنوں کو گذشتہ ہفتے جمعے کے دن اس وقت دہشتگردانہ حملے کا نشانہ بنایا گیا تھا جب وہ کام کے بعد اپنی رہایشگاہ واپس لوٹ رہے تھے۔اس حملے میں پندرہ ایرانی شہید اور چار دیگر زخمی ہوئے تھے جبکہ ایک عراقی ڈرائیور اور ایک عراقی شہری بھی جو ساتھ میں کام کرتے تھے، شہید ہوگئے تھے۔اس دہشتگردانہ حملے کے بعد سے حملہ آوروں اور اس حملے کے منصوبے سازوں کا تعاقب جاری تھا اور عراق کے وزیر اعظم نوری المالکی کی ہدایات پر اس سلسلے میں ایک کمیٹی بھی تشکیل دی گئی تھی۔