صدر ایران کا شہباز شریف سے رابطہ، صیہونی حملوں پر پاکستان کے مؤقف کو سراہا

شیعیت نیوز : ہفتہ کی سہ پہر پاکستانی وزیرِاعظم شہباز شریف کے ساتھ فون پر گفتگو کرتے ہوئے صدرِ ایران ڈاکٹر مسعود پزشکیان نے گزشتہ رات اقوامِ متحدہ کی سلامتی کونسل کے اجلاس میں پاکستان کے مؤقف پر شکریہ ادا کیا۔

صدرِ ایران نے کہا کہ جو لوگ انسانی حقوق کے دفاع کا دعویٰ کرتے ہیں، وہ نہ صرف صیہونی حکومت کی جارحیت کی حمایت کر رہے ہیں بلکہ اس حکومت کو ہتھیار اور سازوسامان فراہم کرکے ان غیر انسانی اقدامات میں مزید شہ دے رہے ہیں۔

انہوں نے مزید کہا کہ جنگ کے بھی کچھ اصول ہوتے ہیں لیکن صیہونی حکومت نے مغربی ممالک کی حمایت سے ان اصولوں کی کھلم کھلا خلاف ورزی کی ہے۔

یہ بھی پڑھیں : پورا عالم اسلام ایران کے شانہ بشانہ کھڑا ہے، مولانا فضل الرحمان

صدر مسعود پزشکیان نے صیہونی حکومت کے حالیہ حملوں کے خلاف اسلامی جمہوریہ ایران کے ردعمل کا حوالہ دیتے ہوئے کہا کہ اگر ایران اس مجرم اور طفل کش حکومت کے خلاف اپنا دفاع نہ کرتا تو ہمیں روزانہ صیہونی جارحیت کا سامنا کرنا پڑتا اور ہمارے سائنسدانوں کو قتل کیا جا رہا ہوتا۔

انہوں نے مزید کہا کہ ان واقعات سے یہ واضح ہوتا ہے کہ ایران کو اپنی دفاعی طاقت ہر حال میں مضبوط بنانا ہوگی۔

ٹیلیفونک گفتگو کے دوران وزیرِاعظم پاکستان شہباز شریف نے کہا کہ پاکستان کی حکومت اور قوم، اسلامی جمہوریہ ایران کے ساتھ کھڑی ہے۔ انہوں نے ایران پر صیہونی حکومت کی جارحیت کو بین الاقوامی قوانین کی صریح خلاف ورزی قرار دیا اور عام شہریوں، فوجی عہدیداروں اور سائنسدانوں کی شہادت پر تعزیت کرتے ہوئے ایران کی حکومت اور عوام سے دلی ہمدردی کا اظہار کیا۔

وزیرِاعظم نے یہ بھی کہا کہ پاکستان، ایرانی حاجیوں کی واپسی کے آپریشن میں تعاون کے لیے تیار ہے۔