عالمی یوم یمن کے موقع پر پورا یمن سراپا احتجاج، بڑے بڑے مظاہرے اور ریلیاں

شیعیت نیوز: عالمی یوم یمن کے موقع پر یمن کے پندرہ صوبوں میں بڑے بڑے مظاہرے ہوئے اور ریلیاں نکالی گئیں جن میں لاکھوں یمنی شہریوں نے شرکت کر کے امریکہ سعودی عرب اور اسرائیل کے مظالم اور جارحیتوں کی مذمت کی۔

دنیا کے مختلف ملکوں کے سیاسی اور سماجی رہنماؤں نے پچیس جنوری کو عالمی یوم یمن کا نام دیا ہے اور یمن میں جنگ بندی اور قیام امن کی تحریک شروع کی ہے- اسی مناسبت سے یمن میں بھی دارالحکومت صنعا سمیت پورے ملک میں امریکہ اور سعودی عرب کے خلاف مظاہروں اور ریلیوں کی کال دی گئی تھی۔

صنعا سے موصولہ اطلاعات کے مطابق پورے یمن اور خاص طور پر صنعا میں لاکھوں افراد نے امریکہ مخالف مظاہرے کر کے یمن پرامریکی جارحیت اور مظالم کی مذمت کی۔

سب سے بڑا اجتماع صنعا میں ہوا جس میں مظاہرین نے یمن پر مسلط کردہ جنگ کا ذمہ دار امریکہ کو قراردیتے ہوئے امریکی حکومت کو ریاستی دہشت گرد بتایا گیا۔

یہ بھی پڑھیں : مرثیہ گو شاعر ریحان اعظمی داعی اجل کو لبیک کہتے دنیا سے منتقل ہوگئے۔

مظاہرین نے سعودی اور امریکی جارحیت کی مذمت کرتے ہوئےعالمی اداروں سے مطالبہ کیا کہ وہ امریکہ اور سعودی عرب جیسی جارح حکومتوں پر دباؤ ڈال کر یمن میں جنگ کا خاتمہ کرائیں۔

مظاہرین نے عوامی انقلابی تحریک انصاراللہ کو دہشت گرد قرار دینے کے امریکی فیصلے کی بھی سخت الفاظ میں مذمت کی ۔ مظاہرین کے ہاتھوں میں ایسے پلی کارڈ تھے جن پر امریکی حکومت کے فیصلے اور سعودی جارحیت کی مذمت میں نعرے درج تھے۔

مظاہرین کا کہنا تھا کہ ملک میں جاری جنگ در حقیقت امریکی جارحیت ہے اور سعودی عرب نے امریکہ کے کہنے پر ہی یہ جنگ مسلط کی ہے اور یمنی عوام کی نسل کشی کا اصل ذمہ دار خود امریکہ ہے ۔

یمنی مظاہرین نے اعلان کیا کہ ان کے ملک پر مسلط کردہ جنگ در حقیقت امریکی و صیہونی جارحیت ہے اور آل سعود نے امریکہ کی ایما پر ہی یمن پر چڑھائی کی ہے۔ 25 جنوری کو ’عالمی یومِ یمن‘ قرار دیا گیا ہے جس کا مقصد وہاں پر جاری بیرونی جنگ و جارحیت کی روک تھام کے لئے عالمی سطح پر جد و جہد کرنا ہے۔