سعودی عرب کا شام میں داعش کے خلاف فوجی آپریشن میں حصہ لینے کا اعلان

ریاض(مانیٹرنگ ڈیسک) سعودی عرب کی وزارت دفاع کے مشیر اور عرب اتحادی فوج کے ترجمان جنرل احمد عسیری نے کہا ہے کہ ان کا ملک شام میں امریکا کی قیادت میں داعش کے مرکز الرقہ میں فوجی آپریشن میں حصہ لینے کے لیے تیار ہے۔
عرب میڈیا کے مطابق جنرل عسیری کا کہنا ہے کہ توقع ہے کہ جلد ہی امریکا کی قیادت میں شام کے الرقہ شہر میں داعش کے گڑھ میں فوجی آپریشن شروع کیا جائے گا۔ ضرورت پڑی اور ہم سے مدد مانگی گئی تو سعودی عرب اس آپریشن میں بھرپور حصہ لے گا۔خیال رہے کہ امریکا شام کے شہر الرقہ میں داعش کے خلاف کارروائی کے لیے ایک ایسےو قت میں تیاری کررہا ہے جب دوسری جانب عراق کے شہر موصل میں داعش کے مرکز کی طرف عراقی اور اتحادی فوج کی پیش قدمی جاری ہے۔
سعودی مشیر دفاع کا کہنا ہے کہ ریاض الرقہ میں داعش کے خلاف متوقع فوجی آپریشن میں فضائی حملوں کی حد تک حصہ لینے کے لیے تیار ہے۔ انہوں نے انکشاف کیا کہ 2014 میں داعش کے خلاف وجود میں آنے والے عالمی اتحاد کی زیرنگرانی سعودی عرب داعش کے ٹھکانوں پر 201 فضائی حملے کرچکا ہے۔
جنرل عسیری کا کہنا تھا کہ عالمی اتحاد کا حصہ ہونے کے ناطے سعودی عرب داعش کے خلاف کسی بھی آپریشن میں حصہ لینے کا پابند ہے۔ سعودی عرب داعش کے خلاف فضائی حملوں میں حصہ لے گا۔ شام میں داعش کے خلاف کارروائی کی صورت میں سعودی عرب ترکی کا انجیرلیک فوجی اڈہ استعمال کرے گا۔موصل آپریشن میں حصہ نہ لینے کا اعلان کے ایک سوال کے جواب میں سعودی مشیر دفاع نے کہا کہ جب سے داعش کے خلاف عالمی اتحاد وجود میں آیا ہے سعودی عرب نے عراق کی سرزمین کے اندر داعش کے خلاف کسی کارروائی میں حصہ نہیں لیا۔ یہی وجہ ہے کہ سعودی عرب عراق کے شمالی شہر موصل میں داعش کے خلاف جاری آپریشن میں حصہ نہ لینے کے اپنے فیصلے پر قائم ہے۔ایک سوال کے جواب میں جنرل احمد عسیری نے کہا کہ سعودی عرب کے لیے ایسے کسی آپریشن میں حصہ لینے کا کوئی جواز نہیں جس میں ایرانی حمایت یافتہ الحشد الشعبی جیسے عسکریت پسند گروپ شامل ہوں