ایران میں بحرینی حکومت کے طالمانہ اقدامات کے خلاف احتجاج
ایران کے مقدس شہر قم میں علما اور طلبا نے بحرینی حکومت کے ظالمانہ اقدامات اور بحرین کے بزرگ عالم دین آیت اللہ شیخ عیسی قاسم کی شہریت منسوخ کئے جانے کے فیصلے کے خلاف ایک بڑا احتجاجی اجتماع کیا۔
بحرینی حکومت کے ظالمانہ اقدامات کی مذمت میں حوزہ علمیہ قم کے علما اور طلبا کے اس احتجاجی اجتماع کے شرکا نے آل خلیفہ کی مخاصمانہ اور ظالمانہ پالیسیوں کی مذمت کرتے ہوئے عالمی اداروں سے مطالبہ کیا کہ وہ بحرینی حکومت کے انسانیت سوز اقدامات کا نوٹس لیں- اجتماع میں شریک علما اور طلبا نے بحرینی عوام سے اپنی یکجہتی کا اظہار کیا-
اجتماع سے خطاب کرتے ہوئے ورلڈ اہل بیت اسمبلی کے سیکریٹری جنرل حجت الاسلام محمد حسن اختری اور ایران میں آیت اللہ شیخ عیسی قاسم کے نمائندے حجت الاسلام شیخ عبداللہ الدقاق نے بحرینی حکومت کے ظالمانہ اقدامات کی سخت الفاظ میں مذمت کی-
اس درمیان ایمنسٹی انٹرنیشنل میں بحرین کے امور کے کوآرڈینیٹر بلوٹیگن نے بھی اپنے ایک بیان میں بحرین میں حکومتی کارندوں کے ہاتھوں عام شہریوں کی گرفتاریوں اور آیت اللہ شیخ عیسی قاسم کی شہریت منسوخ کئے جانے کی مذمت کی اور کہا ہے کہ بحرینی حکومت کے یہ اقد امات خودسرانہ اور ظالمانہ ہیں۔
