جمہوریہ ایران کے صدر ڈاکٹر حسن روحانی پچیس مارچ کو پاکستان کا دورہ کریں گے
حسن روحانی کے دورہ پاکستان سے دونوں ملکوں کے درمیان تعلقات کو مزید مضبوط بنانے میں مدد ملے گی۔
یہ بات اسلام آباد میں متعین ایرانی سفیر مہدی ہنردوست نے پاکستان کے وزیر دفاع خواجہ محمد آصف کے ساتھ ایک ملاقات کے دوران کہی۔ انہوں نے کہا کہ رواں ماہ کی پـچیس تاریخ کو صدر ایران کا دورہ پاکستان نہایت مثبت نتائج لائے گا، دونوں ملکوں کے تعلقات مزید مضبوط ہوں گے۔
مہدی ہنردوست کا کہنا تھا کہ صدر حسن روحانی پاکستان میں اپنے دو روزہ قیام کے دوران وزیراعظم نواز شریف اور صدر ممنون حسین سے ملاقات کریں گے۔ انہوں نے کہا کہ دونوں ممالک کے رہنماؤں کے درمیان مشرق وسطیٰ اور خطے کی صورتحال ، توانائی اور دوسرے شعبوں میں تعاون پر تبادلہ خیال کیا جائے گا۔
پاکستان کے وزیردفاع خواجہ آصف نے اس موقع پر کہا کہ پاکستان کی حکومت اور عوام ایرانی صدر کے دورے کا بڑی بے چینی کے ساتھ انتظار کر رہے ہیں۔
انہوں نے کہا کہ ایران پر عائد پابندیاں ختم ہونے سے پورے خطے میں اقتصادی ترقی کی نئی راہیں کھلیں گی۔
خواجہ آصف کا کہنا تھا کہ چین پاکستان اقتصادی راہداری منصوبہ ایران سمیت خطے کے دیگر ممالک کے لیے بھی اہم ہے اور اس منصوبے سے تمام برادر ملکوں کو فائدہ اٹھانا چاہیے۔
پاکستان کے وزیردفاع اور ایرانی سفیر کے درمیان ملاقات میں توانائی، تجارت اور دفاع سمیت دیگر شعبوں میں تعاون بڑھانے کے حوالے سے تبادلہ خیال کیا گیا جبکہ اقتصادی سرگرمیوں میں اضافے اور زیر التوا منصوبوں کو مکمل کرنے کے لیے اقدامات کرنے پر بھی اتفاق کیا گی
