العراقیہ اتحاد معافی مانگے

عراق کے قومی اتحاد کے رکن حسن السنید نے العراقیہ اتحاد خصوصا اس اتحاد کے سربراہ ایاد علاوی سے مطالبہ کیا ہے کہ وہ عراق میں بروقت حکومت کی تشکیل کی راہ میں روڑے اٹکانے کی بنا پر عراق کے سیاسی گروہوں اور عوام سے معافی مانگیں۔ حسن السنید نے العراقیہ ٹی وی چینل سے گفتگو کرتے ہوۓ کہا کہ العراقیہ سے وابستہ اراکین پارلیمنٹ نے حتی جمعرات کے دن بلاۓ جانے والے پارلیمنٹ کے اجلاس میں واک آؤٹ کر کے عراق کے صدر اور پارلیمنٹ کے اسپیکر کے انتخاب کی راہ میں روڑے اٹکانے کی کوشش کی۔ واضح رہے کہ العراقیہ گروہ کے سیکولر سربراہ ایاد علاوی  نے امریکہ اور بعض عرب حکومتوں کی تشہیراتی اور مالی امداد کی بناء پر عراق کی تین سو پچیس نشستوں میں سے اکانوے نشستیں حاصل کی اور پارلیمانی انتخابات میں کامیابی حاصل کرنے والی دوسری سیاسی جماعتوں کے ساتھ ان کے اختلافات کی وجہ سے عراق میں حکومت کی تشکیل میں آٹھ ماہ کی تاخیر ہوگئی۔