ایران پاکستان اور ھندوستان میں شب نو محرم کی عزاداری

ایران میں آج شـب نو محرم ہے اور اسی مناسبت سے ایران کے تمام چھوٹے بڑے شہروں اور خاصطور سے مقدس شہروں مشہد اور قم کی سڑکوں اور تمام راستوں پر جلوس عزاء اور ماتمی انجمنوں کی جانب سے سینہ زنی اور زنجیر زنی کا سلسلہ جاری ہے جبکہ ہر ماتمی دستہ میں علم مبارک حضرت عباس (ع) لہراتا ہوا نظر آرہا ہے ۔ پاکستان و ہندوستان میں بھی آج شـب نو محرم ہےاور اس شب کو شب تاسوعای حسینی کہتے ھیں ۔ چودہ صدیاں بیت جانے کے باوجود صحرائے کربلا کے خونریز واقعہ اورنواسۂ رسولۖ حضرت امام حسین (ع)اور آپ کے اصحاب باوفا کی شہادت کی اہمیت اور اس واقعہ کی منزلت میں نہ صرف کوئی کمی واقع نہیں ہوئی بلکہ ان میں اورزیادہ اضافہ ہوتا جارہا ہے اور جیسے جیسے وقت بیت رہا ہے پیغام کربلا اور زیادہ فروغ پارہا ہے نیز عزادارئی سیّدالشہداء کی شان و عظمت بھی مزید بڑھتی جارہی ہے ۔ اسلامی جمہوریۂ ایران کا ریڈیو ٹیلیویژن، تاسوعا اور عاشورائے حسینی کی آمد کی مناسبت مسلمانان عالم اور شیعیان جہان نیز دنیا کے تمام حریت پسندوں کی خدمت میں با دل مغموم دل کی اتاہ گہرائی سے تعزیت پیش کرتا ہے ۔