صعدہ میں شہری کے گھر پر سعودی بمباری سے 7 بچوں سمیت 10 افراد شہید، 23 زخمی، یمنی وزارت صحت

شیعیت نیوز : یمن کی وزارت صحت و ماحولیات نے اعلان کیا ہے کہ صوبہ صعدہ کے ضلع سحار میں ایک شہری کے گھر پر سعودی جارحیت کے فضائی حملے میں شہداء کی تعداد بڑھ کر 10 اور زخمیوں کی تعداد 23 ہو گئی ہے، جن میں بڑی تعداد خواتین اور بچوں کی ہے۔

یہ بھی پڑھیں : تعز کے علاقے مقبنہ میں سعودی جارحیت سے خاتون اور بچی سمیت 9 شہری شہید، 16 زخمی، یمنی وزارت صحت

وزارت صحت کے مطابق آل سعود کے جنگی طیاروں نے اتوار کے روز سحار کے علاقے الطویلہ میں علی القحم نامی شہری کے گھر کو نشانہ بنایا، جس کے نتیجے میں 7 بچے اور ایک خاتون شہید ہو گئے۔ زخمیوں میں 12 بچے شامل ہیں جن کی حالت تشویشناک ہے، جبکہ 10 خواتین بھی زخمی ہوئی ہیں۔

ابتدائی اطلاعات میں 9 شہداء اور 17 زخمیوں کی اطلاع دی گئی تھی، تاہم ملبے تلے دبے افراد کی تلاش کے دوران یہ تعداد بڑھتی گئی۔ حملے میں گھر کا بڑا حصہ تباہ ہو گیا اور امدادی کارکن اور مقامی شہری ملبے میں لاپتہ افراد کی تلاش میں مصروف رہے۔

یمنی وزارت خارجہ نے اپنے بیان میں کہا کہ سعودی دشمن یمن میں شہریوں کے خلاف روزانہ جرائم کا ارتکاب کر رہا ہے اور اتوار کے اس قتل عام کا مرتکب وہی فریق ہے جس نے مئی 2015 میں پورے صعدہ شہر کو فوجی ہدف قرار دیا تھا۔ وزارت کا کہنا تھا کہ دنیا کے کسی اور خطے میں ایسے جرائم ہوتے تو عالمی سطح پر شدید مذمت ہوتی، مگر سعودی دولت نے عالمی خاموشی خرید لی ہے اور سیاسی و معاشی مفادات انسانی اصولوں اور بین الاقوامی قانون پر حاوی ہو گئے ہیں۔

یمنی وزارت خارجہ نے واضح کیا کہ تقریباً 12 برس سے جاری حملے اور محاصرہ یمن کو اپنے جائز حقوق سے دستبردار ہونے پر مجبور نہیں کر سکتے اور سعودی دشمن کو جارحیت ختم کرنے اور محاصرہ اٹھانے پر مجبور کرنے کی جدوجہد جاری رہے گی۔