عام معافی سچی اور نافذ ہے، سعودی کیمپوں میں موجود یمنی بھائی اپنے گھروں کو لوٹ آئیں، گورنر تعز

شیعیت نیوز : یمن کے صوبہ تعز کے گورنر احمد المساوی نے کہا ہے کہ یمن کی سپریم پولیٹیکل کونسل کے سربراہ فیلڈ مارشل مہدی المشاط کی جانب سے اعلان کردہ عام معافی سچی اور نافذ العمل ہے، جس نے ایک نیا باب کھولا ہے اور ایک ہی خاندان کے بچھڑے افراد کو پھر سے جوڑ دیا ہے۔ انہوں نے یہ بات سعودی ایجنڈے کے پیچھے چلنے والے اور سعودی کیمپوں میں بھرتی ہونے والے تعز کے نوجوانوں کے نام اپنے پیغام میں کہی۔

یہ بھی پڑھیں : عام معافی ہمیشہ نہیں رہے گی، دشمن کی صفوں میں لڑنے والے ہتھیار ڈال دیں، یمنی اسیران کمیٹی کے سربراہ

گورنر تعز نے کہا کہ دشمن سعودی رجیم نے ہمارے سماجی تانے بانے کو توڑنے اور یمنیوں کو ایک دوسرے کا دشمن بنانے کی کوشش کی، جبکہ ہم دین، وطن اور انسانیت کے رشتے میں بھائی ہیں۔ انہوں نے کہا کہ ہم ماضی کو یاد کر کے کسی کا مواخذہ نہیں کرنا چاہتے، آپ کا خون محفوظ ہے، آپ کی عزت محفوظ ہے اور آپ کا مال محترم ہے، اپنے اہل خانہ، دیہات اور شہروں کو لوٹ آئیں اور عزت و وقار کے ساتھ زندگی گزاریں، کیونکہ وطن اپنے تمام بیٹوں کے لیے کشادہ ہے۔

احمد المساوی نے کہا کہ گزشتہ برسوں میں بیرونی طاقتوں کے ہاتھوں گروی بننے اور ان کے ساتھ بھرتی ہونے کا تجربہ ہر غیرت مند یمنی کے لیے یہ سمجھنے کو کافی ہے کہ وہ قوتیں نہ یمن کے ساتھ ہیں اور نہ یمنیوں کے ساتھ، بلکہ وہ صرف یمن کو کمزور کرنا اور اس کی صفوں میں دراڑ ڈالنا چاہتی ہیں۔ انہوں نے کہا کہ یمنیوں کا آپس میں مل جانا ان نودولتیوں کے پیچھے چلنے سے کہیں کم نقصان دہ ہے جنہوں نے بار بار یمن کی تحقیر کی۔

گورنر تعز نے کہا کہ آپ میں ایسی صلاحیتیں اور شجاعت موجود ہے جو آپ کو یمنی مسلح افواج میں بڑا کردار ادا کرنے اور وطن کی خودمختاری کے دفاع کے قابل بناتی ہے۔ انہوں نے زور دیا کہ حقیقی دشمن سعودی رجیم اور اس کے پیچھے چلنے والے ہیں جو یمن کی سلامتی، مستقبل اور وسائل کو نشانہ بنا رہے ہیں، لہٰذا ہمارا اسلحہ یمنی مسلح افواج اور اس کی قیادت کے ساتھ اس جارحیت کے مقابلے میں ہونا چاہیے۔