پورے جی بی میں ایک انچ خالصہ سرکار نہیں بلکہ عوامی اراضی ہے،آغا علی رضوی

شیعیت نیوز:مجلس وحدت مسلمین پاکستان گلگت بلتستان کے سربراہ آغا علی رضوی نے کمشنر بلتستان سے گفتگو کرتے ہوئے کہا کہ جی بی میں خالصہ سرکار کا تصور انتہائی افسوسناک اور قابل مذمت ہے۔ پورے جی بی میں ایک انچ خالصہ سرکار نہیں بلکہ عوامی اراضی ہے۔ خالصہ سرکار کی آڑ میں گلگت بلتستان میں بے چینی پھیلانے کی تمام تر کوششیں قابل مذمت ہیں۔ عوامی اراضی پر قبضے کی کوشش ظلم ہے اور اس ظلم پر کسی صورت خاموش نہیں رہا جاسکتا۔ انہوں نے کہا حکومت کو جہاں کہیں زمین درکار ہے معاوضہ دیکر حاصل کرے۔ زبردستی قبضے کی کوشش کی گئی تو چلاس سے لے کر خپلو کی سرحد تک عوام میں تحریک چلائی جائے گی۔ آغا علی رضوی نے کہا کہ اسکردو کی بات ہی نہیں چلاس اور داریل تانگیر میں بھی عوامی اراضی پر قبضہ کرنے نہیں دیں گے۔ انتظامیہ گلگت بلتستان کی تعمیر و ترقی میں مثبت کردار ادا کرے اور عوام میں مایوسی پھیلانے کی کوشش نہ کرے۔ اجلاس کے بعد میڈیا سے گفتگو کرتے ہوئے آغا علی رضوی نے کہا کہ مضبوط گلگت بلتستان ہی مضبوط پاکستان کا ضامن بن سکتا ہے اور مضبوط جی بی یہاں کے عوام کی ترقی و خوشحالی کے بغیر ممکن نہیں۔ ہم ہر اس اقدام کے خلاف اٹھ کھڑے ہونگے جہاں عوام کا استحصال اور ظلم و زیادتی ہو۔ جی بی کے عوام ہر حوالے سے کمزور اور مستضعف ہیں۔ تعلیمی صورتحال ناگفتہ بہہ، طبی سہولیات ناپید، انفراسٹریکچر ناقابل بیان اور فلاحی منصوبے نہ ہونے کے برابر ہے۔ ایسے میں عوامی اراضی کو ہتھیانا یہاں کے عوام کو مزید کمزور کرنے کی کوشش ہے۔ انہوں نے کہا کہ اگر جی بی میں ہر مکتبہ فکر اور علاقے کے مسائل کے حل کے لیے صف اول کا کردار ادا کرتے رہیں گے۔