علامہ ساجد نقوی کی مولانا نذیر عمرانی پر قاتلانہ حملہ کی شدید مذمت
اسلامی تحریک پاکستان کے سربراہ علامہ سید ساجد علی نقوی کی مولانا پروفیسر نذیر حسین عمرانی پر قاتلانہ حملے کی شدید الفاظ میں مذمت، ملک میں عملاً دہشت گردوں کا راج ہے، شیعہ علماء کونسل کے سیکرٹری جنرل علامہ عارف حسین واحدی کی بھی واقعہ کی شدید الفاظ میں مذمت، اعلٰی سطحی وفد کی بے نظیر ہسپتال میں پروفیسر نذیر حسین عمرانی کی عیادت، جلد صحت یابی کی دعا۔ تفصیلات کے مطابق بدھ کے روز قصر سجاد اقبال ٹاؤن ٹاؤن کے پیش نماز مولانا پروفیسر نذیر حسین عمرانی کو راولپنڈی میں حشمت کالج کے قریب نامعلوم دہشت گردوں نے اندھا دھند فائرنگ کرکے شدید زخمی کر دیا، جنہیں فوری طور پر بے نظیر ہسپتال راولپنڈی پہنچایا گیا، اس موقع پر شیعہ علماء کونسل کے مرکزی و ضلعی عہدیداران فوری طور پر ہسپتال پہنچ گئے۔
ادھر علامہ سید ساجد علی نقوی نے واقعہ کی شدید الفاظ میں مذمت کرتے ہوئے کہا ہے کہ ملک میں عملاً دہشت گردوں کا راج ہے دہشت گرد جہاں چاہتے ہیں، جسے چاہتے ہیں، ٹارگٹ کرکے آسانی سے فرار ہونے میں کامیاب ہو جاتے ہیں، مگر انہیں کوئی گرفتار کرنے والا نہیں۔ انہوں نے کہا کہ دہشت گردوں کو جب تک کیفر کردار تک نہیں پہنچایا جاتا، اس وقت تک ملک میں امن قائم نہیں ہوسکتا۔ اس موقع پر انہوں نے پروفیسر مولانا نذیر حسین عمرانی کی جلد صحت یابی کے لئے بھی دعا کی۔ واقعہ کی اطلاع ملتے ہی شیعہ علماء کونسل پاکستان کے مرکزی سیکرٹری مالیات مشتاق حسین ہمدانی، ضلعی صدر مولانا غلام قاسم جعفری، علامہ فرحت عباس جوادی، مولانا نصیر حسین موسوی، مولانا سید شمس حیدر سبزواری، علامہ سید حسن رضا نقوی، سید محمود علی نقوی، سید کونین حسینی، مولانا ملک محمد یوسف، سید عزادار کاظمی، ڈاکٹر سید قلب عباس اور ولایت بلتی بے نظیر ہسپتال پہنچ گئے۔ اس موقع پر علمائے کرام کے وفد نے میڈیا سے گفتگو کرتے ہوئے کہا کہ واقعہ میں ملوث دہشت گردوں کو فوری طور پر گرفتار کیا جائے، جب تک قاتلوں کے سرپرستوں کو بے نقاب کرکے انہیں کیفر کردار تک نہیں پہنچایا جاتا، اس وقت تک بے گناہ افراد ٹارگٹ کلنگ کا نشانہ بنتے رہیںگے۔
