جمعہ، علی عبداللہ صالح کے اقتدار کا آخری دن، سیف وشلی

یمن کی ڈیموکریٹک پارٹی کے سیکرٹری جنرل سیف وشلی نے عوام سے آئندہ جمعہ کے روز لاکھوں کی تعداد میں مظاہروں میں شرکت کرنے کی اپیل کرتے ہوئے اس دن کو علی عبداللہ صالح کے لیے فیصلہ کن دن قرار دیا ہے۔

سیف وشلی نے العالم ٹی وی چینل سے بات چیت کرتے ہوئے یمن کے تمام طبقوں سے اپیل کی ہے کہ وہ مظاہرین کا ساتھ دینے اور حکومت کے خلاف  انقلاب کی کامیابی میں مدد دینے کے لیے آئندہ جمعہ کو ہونے والے مظاہروں میں شرکت کریں اور اس ملک کے ڈکٹیٹر علی عبداللہ صالح کی قسمت کا فیصلہ کریں۔ انہوں نے کہا کہ پچیس فروری یمن کی آمریت کے خاتمے کا دن ہے کیونکہ عوام نے فیصلہ کر لیا ہے کہ وہ اس انقلاب کو حکومت کے خاتمے تک جاری رکھیں گے تاکہ اس کے بعد وہ اپنی تقدیر کا فیصلہ خود کر سکیں اور ایک آزاد اور جمہوری حکومت تشکیل دے سکیں۔

ادھر یمن کے شہر عدن میں جھڑپوں کے دوران ایک شخص ہلاک اور کئی زخمی ہو گئے ہیں۔ مظاہرین یمن میں تینتیس سال سے برسراقتدار ڈکٹیٹر علی عبداللہ صالح کی برطرفی کا مطالبہ کر رہے تھے۔

دوسری جانب یمن کی پارلیمنٹ میں حزب اختلاف کی جماعتوں کے نمائندے عوامی تحریک میں شامل ہو گئے ہیں۔

ان نمائندوں نے عوامی احتجاجی تحریک کی حمایت کرتے ہوئے کہا ہے کہ ہتھیاروں کی دھمکی کے سائے میں حکمران جماعت کے ساتھ مذاکرات نہیں کیے جا سکتے۔ ان نمائندوں نے ایک بیان میں کہا ہے کہ وہ نوجوانوں کے ساتھ مل کر ظلم اور بدعنوانی کے خلاف اٹھ کھڑے ہوں گے۔