ایرانی جوان شام میں حرم اہلبیت(ع) کی حفاظت کے لیے تیار/ کل مقاومت کے حمایت میں مظاہروں کی کال
ایران کے جوانوں نے مشترکہ بیان جاری کر کے شام میں امریکہ اور اسرائیل کے خلاف جہاد کرنے اور حضرت زینب(س) اور حضرت سکینہ(س) کے روضوں کا دفاع کرنے کے لیے اپنی آمادگی کا اظہار کیا ہے۔
ایرانی جوانوں نے اپنے بیان میں کہا ہے کہ اے حضرت زینب (س) کل اگر جناب عباس(ع) نے آپ کے پردے کی حفاظت کی خاطر اپنے شانے کٹوائے تو آج بھی آپ کے روضے کی حفاظت کی خاطر اپنے گلے کٹوانے کو تیار ہیں۔ اے حضرت زینب(س) ہم آپ کے عباس ہیں۔
ان جوانوں نے ایران اور عراق کی حکومتوں سے اپیل کی ہے کہ ہمارے لیے شام جانے کے راستے کھول دیں تاکہ ہم دشمنان اسلام عالمی استکبار اور صہیونیزم کو حملے کا مزہ چکھا دیں۔
انہوں نے شام کی حکومت سے بھی درخواست کی ہے کہ وہ ایرانی جوانوں کو اپنے ملک میں امریکہ اور اسرائیل کا مقابلہ کرنے کی اجازت دے تاکہ وہ اس بہانے سے بیت المقدس کی آزادی کے لیے شام سے کاروائی شروع کریں۔
انہوں نے شامی حکومت سے مطالبہ کیا ہے کہ وہ انہیں اجازت دے تاکہ وہ شام سے اسرائیل کے شہروں کو نشانہ بنا کر اسرائیل کو صفحہ ہستی سے مٹا دیں اور ہمیشہ سے جو مرگ بر اسرائیل کا نعرہ بلند کرتے رہے ہیں اسے عملی جامہ پہنا دیں۔
ایران کے جوانوں نے کل نماز جمعہ کے بعد شام پر امریکی جارحیت کے خلاف اور اسلامی مقاومت کی حمایت میں صدائے احتجاج بلند کرتے ہوئے پورے ایران میں مظاہرے کرنے کی اپیل کی ہے۔
